الأورام من أكتر الأمراض المنتشرة حالياً وفي نفس الوقت من أكتر الأمراض اللي ناس كتير فاكرينها مرض خطير جدا وصعب علاجه، لكن في الحقيقة مع التطور الطبي اللي وصلنا ليه بقى من السهل جداً علاجها ، وفي البوست دا هنشرحلكم بالتفصيل ايه هي الأورام بشكل عام 

الأورام هي نمو غير طبيعي بتظهر في خلايا الجسم وممكن تكون أورام حميدة أو خبيثة، ودلوقتي هنتعرف على كل نوع بالتفصيل :

– الأورام الحميدة هي أورام غير سرطانية وبتنقسم لنوعين من الاورام وهي الاورام اللي بتظهر في الأنسجة اللينة والأورام اللي بتظهر في العظام، ولكن الأورام اللي بتظهر في الأنسجة اللينة هي الأكثر انتشاراً ومن الممكن انها تظهر في أي مكان بالجسم وفي العضلات أو الأعصاب أو الأوعية الدموية، وتختلف الأورام الحميدة بشكل كبير سواء في مظهرها أو طريقة تطورها، وبيلجأ الطبيب المعالج لاستخدام أساليب متخصصة في استئصالها بالإضافة للعلاج الإشعاعي للتقليل من احتمال رجوعها مرة تانية، والأورام الحميدة بتظهر في أي مرحلة عمرية خصوصاً مع التقدم في السن.

أما الأورام الخبيثة على عكس الأورام الحميدة لأنها أورام سرطانية وعندها القدرة على الإنتشار في كل أعضاء الجسم وتدميرها، ويعتبر الفحص الطبي المنتظم لاكتشاف الورم وعلاجه في مراحله الأولى هو اساس النجاح المقدم ليه
وفي بعض أنواع السرطانات مش بتسبب ظهور الورم أو أي كتل زي سرطان الدم ( اللوكيميا )

من أهم العوامل اللي ممكن تساهم في ظهور الأورام الحميدة:
– السموم البيئية والتعرض للإشعاعات.
– النظام الغذائي الغير صحي.
– العوامل الوراثية الجينية.
– بعض أنواع العدوى والإلتهابات.

والسبب الرئيسي لظهور الورم الخبيث هو التحور اللي بيحصل للشريط الوراثي ( DNA ) داخل الخلايا، والتحورات دي بتخلي الخلايا تحيا لفترة أطول وبالتالي بتؤدي لتراكم الخلايا السرطانية وانتشارها.

الطرق المختلفة لعلاج الأورام 

بالنسبة للأورام الحميدة: بيتم علاج معظمها بالإجراء الجراحي ونسبة عودتها مرة تانية بعد العلاج بتكون ضعيفة جدا، يعني نسبة الشفاء منها بدون رجعة بتكون عالية.

أما الأورام الخبيثة ليها أكتر من طريقة لعلاجها وممكن يتم العلاج بأكتر من طريقة في نفس الوقت كبرنامج علاجي، ودا بيعتمد على مرحلة المرض والحالة الصحية للمريض واللي بيفضله المريض. ومن أهم العلاجات دي الجراحة وهي الأكتر استخدام والدواء والعلاج الكيماوي و العلاج الإشعاعي ونسبة رجوعها بتكون عالية حتى لو تم الاستئصال بشكل كامل، عشان كده بتحتاج متابعة مستمرة مع الطبيب للحفاظ على النتيجة وعدم رجوع المرض أو تطوره.