سرطان القولون في الفترة الحالية أصبح منتشر بشكل كبير وفي الغالب بيصيب كبار السن (فوق الـ 50) لكن برضه ممكن يصيب الشخص في اي سن !
في بداية الاصابة بسرطان القولون الموضوع بيكون بسيط وعلاجه سهل لدرجة ان ممكن ماتظهرش اعراض واضحة تدل على وجود الورم! عشان كده بننصح دايما بالفحص الدوري خصوصا لكبار السن 
ومن أهم الأعراض الأولية اللي ممكن تظهر على مريض سرطان القولون في بداية المرض قبل تطوره هي 
– وجود دم مع البراز لونه احمر ساطع وفي حالة لو الشخص مصاب بأنيميا (فقر الدم) ممكن الدم مايظهرش ويظهر براز لونه اسود.
– تغيرات في حركة الأمعاء تسبب اسهال او امساك او عدم تناسق في البراز.
في حالة لو ظهرت الاعراض دي لازم يتم الكشف والتشخيص فورا لأن في المرحلة دي العلاج بيكون أسهل والكتلة الموجودة في القولون مابتكونش لسه تحولت الى ورم سرطاني.
أما لو المرض تطور وتحولت الكتلة الى ورم سرطاني بتظهر هنا اعراض زي :
– انتفاخ البطن بشكل مبالغ فيه.
– الغثيان او القيء المستمر.
– الاحساس بعدم الراحة بعد تفريغ الامعاء.
– تغير ملحوظ في شكل وكمية البراز.
– فقدان للوزن بدون سبب.
وفي الحالة دي بتكون مرحلة العلاج مبنية بشكل اساسي على استئصال جزئي او كلي للقولون على حسب تطور الحالة.
طرق العلاج المختلفة لسرطان القولون ودور كل نوع منهم:
– العلاج بالأدوية: ودا بيتم استخدامه لعلاج سرطان القولون في مراحله الأولى لأن الأدوية دي بتساعد على منع نمو الخلايا السرطانية وممكن كمان يستخدم بعد العملية الجراحية للاشخاص اللي حالتهم متأخرة.
– العلاج الجراحي: ودا الحل الأفضل للتخلص من الورم السرطاني بنسبة شفاء عالية جدا لأن بيتم في العملية استئصال جزء من القولون اللي بيكون فيه الورم مع استئصال جزء من الغدد الليمفاوية اللي حواليه للتأكد من عدم وصول الخلايا السرطانية ليها، وحجم الجزء المستأصل بيكون معتمد بشكل رئيسي على مرحلة تطور الحالة ودي بيتم تحديدها بعد عمل بعض الفحوصات اللازمة.
* العملية دلوقتي بتتعمل بالمنظار الجراحي وليس بالجراحة الكاملة اللي بيتم فيها فتح شق في البطن
– العلاج الكيميائي: بيتم في الغالب بعد إجراء الجراحة واستئصال الورم السرطاني لأنه بيعمل على تدمير الخلايا السرطانية المتبقية خصوصا لو كان المرض وصل لمرحلة متقدمة.
– العلاج الإشعاعي: بيتم في الغالب قبل الجراحة لأنه بيساعد على قتل الخلايا السرطانية وتقليل حجم الورم الكبير لتسهيل ازالته خلال الجراحة وكمان لتخفيف اعراض المرض.