قرحة المعدة مشكلة من المشكلات الهضمية الشائعة جداً واللي دايماً بتكون مزعجة ومؤلمة، وخلونا في البداية نتعرف على مشكلة قرحة المعدة وأعراضها وأسبابها وبعد كدا نتعرف على طرق علاجها 
ايه هي قرحة المعدة؟
قرحة المعدة هي نوع من أنواع القرح الهضمية اللي ممكن تؤثر على الأمعاء الدقيقة، وبتبدأ تظهر لما بتنخفض الطبقة السميكة من المخاط اللي بيحمي المعدة من العصارات الهضمية، ودا اللي بيسمح للأحماض الهضمية بتآكل الأنسجة المبطنة للمعدة، وبالتالي بيتم ظهور قرحة المعدة .

ودلوقتي هنوضح ليكم أهم أعراض قرحة المعدة اللي لازم ننتبه ليها كويس، وبتعتمد شدة الأعراض على شدة القرحة ومن أكتر الأعراض شيوعاً:
– الشعور بالحرقة أو الألم في منتصف البطن ( بين الصدر وسرة البطن ) وفي العادة بيكون الألم أكبر لو المعدة فاضية.
– عدم الرغبة في الأكل وبالتالي بيسبب الألم وفقدان الوزن.
– الانتفاخ والشعور بالغثيان أو القيء..
– حرقان في الصدر.
– براز داكن اللون.
– فقر الدم وضيق في التنفس.
– قيء يحتوي على دم.

ودلوقتي بعد ما اتعرفنا على أعراض قرحة المعدة بالتفاصيل، هنوضح أهم أسبابها ومنها:
– عدوى ببكتيريا جرثومة المعدة هليكوباكتر بيلوري.
– الإستخدام الطويل للعقاقير المضادة للإلتهاب غير الستيرويدية زي الأسبرين أو الأيبوبروفين أو النابروكسين.
– ومن النادر جدا ان تسبب الحالة المعروفة باسم متلازمة زولينجر اليسون قرح المعدة والأمعاء عن طريق زيادة انتاج الجسم من الحمض.

أهم طرق علاج قرحة المعدة  

يختلف العلاج بناءً على سبب القرحة وبينقسم علاج قرحة المعدة لقسمين، اما العلاج الدوائي أو العلاج الجراحي، وبيتم تحديد طريقة العلاج المناسبة بعد التشخيص والرجوع إلى الطبيب المعالج واكتشاف سبب القرحة، وإذا كانت القرحة ناتجة عن عدوى البكتيريا بيتم علاجها بالعلاج الدوائي من المضادات الحيوية والأدوية اللي بتمنع خلايا المعدة من إنتاج الحمض.
وفي حالات نادرة جداً بتحتاج للعلاج بالمنظار الجراحي زي الحالات اللي تم شفائها من القرحة ورجعت تظهر مرة تانية أو الحالات اللي بتنزف وبتمزق المعدة أو الحالات اللي بيحصل فيها منع الطعام من التدفق من المعدة للأمعاء الدقيقة.